Wednesday, April 29, 2015

In onhe napnikan


Nbi neno anaot ma fai afinit lê kamapnikan,
tuafe nabelak taën asait nâko fefan amonit.
Me nbi neno i, naskeket in onhe napnikan
sâ-sâ lê nahunut in namolke ma njail salit.

Yohanes Manhitu in hanfuafin  
Yogyakarta, 23 Funhâ 2015
Posted by at No comments:

Sunday, April 19, 2015

Mlak piuta meu matan


Sekau es a-nkuasa he naëkâ neno
lê ném ma nfin kun natuin in lomit?
Masi ho mloim kum he mhonêkotî,
ho musti mlak piuta meu matan.

Yohanes Manhitu in hanfuafin
Yogyakarta, 15 Funhâ 2015
Posted by at No comments:

Masit susar natau nekam


Kalu pisut ma sít napún-natefan ko,
me ho nekme ka naskék fa laba
he natuin sin ma ntamis mlilê,
masit susar natau ho nekam.

Yohanes Manhitu in hanfuafin
Yogyakarta, 15 Funhâ 2015
Posted by at No comments:

Saturday, April 11, 2015

He Mupèn Malinat


Mpanat ho lomit,
muteut ho nekam,
mumepan ho salit,
mututan ho banit ma
mupèn kum malinat.
Posted by at No comments:

Tabu Alekot


Neonmabê i, tabu alekot
neu tokos, pisut, ma sít.
Tanekun tain neksusar
lê he natau nan monit.
Posted by at No comments:

Friday, April 3, 2015

Maria Magdalena


Foto: https://www.pinterest.com

Atuis: Yohanes Manhitu

            Veritas vos liberabit

Magdala Tarichaea, nane ho kuan.
Es onnane, Magdalena njail ho fam.
Unû atoni ka npiô fa leko ho lalan,
es ka namlilê fa he ntek ho kanam.

Sin nak, unû oras Guru he nbukae,
ho mhaumakE mèk ho minfomenî.
Mupét haene mèk nú fun ho mkae.
Ma ume nanan naheun nok fomenî.

Ho ‘nakamnafum a-njail toli anoset,
ho mnek In haene, okê ho mupete.
Nbi ume nanan nae, ho bifé ameset.
Atoinin lof nakan, “Hoè, mi’éte!”

Me meûsinê nemen neu pah-pinan
ma atoni nahín ho ka bifé asanab fa
lê unû nèk fomenî neu ume nanan.
Ho bifé es kun, ho ka bifé alahî fa.

Ho mutatuina Guru nbi In lalan
tala tabu In a-nsutai nbi haukrús.
Oras In nakalab mèsökan aükan,
mûko òpu, ho muskeken Petrus.

Yogyakarta, Funboësamnuâ 2003

*Veritas vos liberabit (Latín, Lais’amaneot lof nafètin ki)

Posted by at No comments:

"Quod scripsi, scripsi" nèk Uab Metô


"Sâ lê au 'tui ulali ben, matuï nabala."
--Ponsius Pilatus, gubernur Yudea (26–36 AD)
Posted by at No comments:
Subscribe to: Posts (Atom)

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu
ymanhitu@gmail.com

Yogyakarta, 14 Funboësamnuâ 2007